Daniel Álvarez Mora naz un 25 d’Abril del añu ´83 (Uviéu). Entama a tocar la gaita asturiana a los 7 años de la mano del Mayestru Gaiteru José Ángel Hevia en Mieres. Al añu siguiente d’entamar a clase, y compaxinando colos estudios de Clarinete na Escuela Municipal de Música de Mieres, entra a formar parte de la BANDA GAITES MIERES DEL CAMÍN, cola qu’a lo llargo de los años recuerre gran parte de la xeografía asturiana, del Estáu Español y países como Irlanda, Italia y Bretaña Francesa y tamién collabora en dellos conciertos del cantante VICTOR MANUEL y del dúu AMISTADES PELIGROSAS, exerciendo en sucesives actuaciones de director musical. Con esta banda y otres cuatro más, formóse la BANDONA D´ASTURIES na que por separtao alcuentrense les bandes, B.G. Villaviciosa "El Gaitero" (de la que güei ye collaborador habitual y arreglista ocasional), B.G. Mieres del Camín, B.G. Candás, B.G. Rei Aurelio y B.G. Ribeseya, nes que nestes dos caberes tamién fizo llabor de director musical en delles vegaes.
Nel añu ´96 algama’l tercer puestu nel "Memorial Remis Ovalle" pa solistes de gaita asturiana, pasando asina a la final que tien llugar nel Festival Interceltique de Lorient (Concursu Macallan), onde se clasifica en segundu llugar. Tamién tien participao nel Concursu y Muestra de Folclor "Ciudá d’Uvieu", tantu na modalidá de Gaiteros Solistes como na de Bandes de Gaites siendo asina finalista nesta cabera dos años consecutivos.
Nos años 98-2002 foi un de los gaiteros acompañantes nes xires de promoción del primer y segundu discu del so Mayestru Gaiteru, HEVIA, onde percorrió países como Chile, Arxentina, Italia, Portugal, Bélxica, Finlandia y Xapón. Dió los sos primeros pasos nel mundiu del Folk col Grupu FORGAXA d’Uxu (Mieres) nel añu 98.
Nel añu 2002 entamó a tocar col grupu folk ayerán TARAÑU como flauteru autodidacta, pasando por importantes Nueches Celtes de la rexión y por los paises Bélxica e Italia. Amás, con esta agrupación tien participao tamién en dellos concursos de grupos folk como "El Cuartu Los Val.les" (Navelgas) y el "Jamesons Celtic Fest" nel Pub Onneill´s (Madrid). Nesti memu añu ingresa tamién nel grupu GUETA NA FONTE, presentando esti proyeutu en gran parte de la xeografía española y nos países Alemania y Polonia.
Nel cursu 2004/05 foi mayestru de Gaita nel Colexu Públicu de Cabañaquinta (Conceyu d´Ayer), como actividá Extraescolar. Anguaño ye-lo na ESCUELA DE MÚSICA TRADICIONAL DE VILLAVICIOSA.
Nel añu 2005, como nuevu gaiteru de LLANGRES, fizo una xira de Branu por Suiza, Italia y Andorra presentando "Esnalar", el segundu trabayu del grupu. A principios del añu 2006 entama como flauteru nel grupu ribeseyanu CORQUIÉU, col que participa en grandes festivales en Normandía, Bélxica, el Festival Interceltique de Lorient (Bretaña Francesa), el Celtic Connections de Glasgow, onde tamién fexo un conciertu a dúu col gaiteru asturianu JOSE MANUEL TEJEDOR nel tributu a Gordon Duncan. Asina mesmo, pertenez al grupu de la conocía gaitera bretona Marie Le Cam, BREIZH LE CAM onde fai el papel de arreglista al empar que toca la Flauta de maera. Participa tamién n’otros proyeutos como el dúu DANI´S, xunto col guitarrista Dani Díez del Grupu Los Gatos del Fornu, y tamién pertenez a grupos de folk basaos na reellaboración de música tradicional d’otros países del Arcu Atlánticu colos que participa nos programes de Música na Cái contratau pola Fundación de Música Moderna d´Avilés.
Tamién tien collaborao en diferentes conciertos col desapaecíu cuartetu folk BRON, el músicu y showman HÉCTOR BRAGA, el cantautor ALFREDO GONZÁLEZ, los grupos folk cántabros CAMBERA´L CIERZU, NAHEBA y TANEA, el grupu castellano-cántabru VALLARNA, cola BANDA MÚSICA DE CORVERA, la BANDA GAITES NERBIA d´Uviéu, la BANDA GAITES LLACÍN nel espectáculo XIDECES, la BANDA GAITES NOEGA nel espectáculo Poema Sinfónico Noega, la BANDA GAITES VILLAVICIOSA "EL GAITERO" nel CONCIERTU XXV ANIVERSARIU tamién como productor musical, la Orquesta de Cámara del Conservatoriu del Nalón, col grupu NUBERU, con FELPEYU, col famosu grupu EL SUEÑO DE MORFEO, con diversos Grupos de Baille como gaiteru y tamboriteru, con LA BANDINA LA CURUXA, LA BANDINA´L BACHE, col grupu MEZÁ, DUERNA, SKAMA LA REDE.....Tuvo faciendo llabor de flauteru nes presentaciones de "Entamu", el primer trabayu discográficu del grupu BLIMA, onde lu llevó hasta Estonia nel añu 2009 al Viljandi Folk Festival. Collaboró tamién pal programa de Televisión Camín de Cantares de la TPA en 2 de los episodios.
Nel añu 2008 finó el Grau Profesional de Música pola especialidá de Flauta Travesera nel Conservatoriu Profesional del Valle del Nalón (Sama Llangreu). Nel añu 2009 algama´l PREMIU AMAS 08 na estaya Otros Instrumentos y nel 2011 el AMAS 10 a Meyor discu Folk "SUAÑA" y Meyor canción Folk "Bratislava" con Corquiéu.
A parte de les sos especialidades en gaita y flauta, interesase tamién por otros instrumentos como la gaita irlandesa (Uilleann pipe), gaita gallega, el Bouzouki, la guitarra acústica en afinación DADGAD, los teclaos y delles percusiones (Tambor tradicional, Caxa escocesa, bodhran, etc).
MÁS INFORMACIÓN EN:
www.myspace.com/danialvarezmora
www.facebook.com/danialvarezmora
www.twitter.com/danialvarezmora
www.youtube.com/danialvarezmora
danialvarezmora@gmail.com
