DIXEBRA formóse n’Avilés en 1987 y dende entós vien trabayando polo mesmo: llograr afitar un rock asturianu DE VERDÁ. Dende lo primero los sos componentes tuvieron y tienen como oxetivu facer un rock comprometíu con Asturies; asina lo demuestren nes lletres de los sos cantares y nes actitúes personales. Nos sos testos espeyen como naide la bayura y la complexidá de la sociedá asturiana, inspirándose en socedíos o fechos de la so hestoria recién; nun ye nada raro que nellos heba referencies a la vida política, cultural y social d’esta tierra. Otra de les sos premises cimeres ye usar la llingua asturiana, pero col enfotu de qu’esto nun quite d’entender el mensaxe, intentando que l’asturianu seya asequible a toos y nun suene forciao. El tercer factor que define a la banda ye la incorporación na so instrumentación de la gaita (acústica y midi) y la inclusión de melodíes populares o tradicionales na so música, too ello endolcao nun rock potente con influencies a esgaya: ska, punk, reggae, folk, rap… 
Pue definise l’estilu de DIXEBRA como un soníu fuerte con abondo mestizaxe musical, influenciáu pola música tradicional y con testos comprometíos en llingua asturiana.

A lo llargo d’estos años de vida DIXEBRA dio conciertos enforma per toa Asturies y fuera d’ella (Galiza, País Valencià, Cantabria, Euskal Herria, Aragón, Catalunya, Illes Balears, Bretaña, Occitania, Valonia, Castiella…). Destaca tamién el fechu de qu’en 1997 y en 2003 actuaron como representantes asturianos nel afamáu Festival Interceltique de Lorient/An Oriant (Bretaña), onde collecharon en dambes ocasiones mui bones crítiques de los medios especializaos. Yera la primer vez qu’un grupu de rock asturianu participaba nesi alcuentru musical celta tan importante. Amás, tamién nel 97, festexaron los sos diez años de vida con un espectáculu onde la tradición y la modernidá diben a comuña. Contaron pa eso cola participación de la Banda de Gaites Tabladar, dellos collaboradores musicales, la compañía d’animación teatral Tres Ruedas, el colectivu de creación videográfica Bebés Furiosos y los personaxes tradicionales del conceyu de Siero “Los Sidros”. Esti espectáculu tuvo una repercusión bien importante nel mundu musical asturianu.
La mayoría de los sos siguidores y críticos coinciden en que DIXEBRA ye un grupu de directu nesi contactu col públicu ye onde meyor se desenvuelven. Les sos actuaciones caracterícense pola participación espontánea de toos, buscando la mayor comunicación posible ente músicos y espectadores. Bien pue dicise que ye una de les bandes asturianes a les qu’hai que ver en vivo. Tocántenes a les grabaciones, tienen hasta’l momentu nueve discos espublizaos: Grieska (1990), ¿Asturies o trabayes? (1993)Apúntate a la llista (1995), Dieron en duru (1997), Glaya un país (2000), Sube la marea (2002), Cróniques d’un pueblu (2003, discu-llibru fechu pol periodista Francisco Álvarez sobre la so trayectoria), Ensin novedá (2005) y Dixebra n’acción (2006). Destaquen en toos ellos la cantidá de collaboraciones de músicos provenientes de tolos estilos, ente ellos Fonsu Mielgo y Marcos Llope de Llan de Cubel, José Manuel Tejedor, Mario Fueyo (Dark la eMe), Maxi de Fe de Ratas, Anabel Santiago, Evaristo de Gatillazo o Fermín Muguruza. Nes sos lletres nótase una evolución hacia un tonu más lliterariu, onde cuenten hestories con nomes y apellíos que falen de lo local y lo global, pero con espaciu tamién pa los sentimientos (de frustración, rebeldía, resignación…). Son canciones que describen situaciones, pero que se posicionen combativamente énte elles, faciendo reflexonar y llamando a l’acción. Nelles intervienen como collaboradores los escritores Xandru Fernández y Quique Faes.

El so últimu trabayu per agora titúlase Dixebra n’acción. Foi grabáu en directo n’Avilés en xunu de 2006, y contó cola producción de Kaki Arkarazo (Kortatu, Negu Gorriak…) y Sergio Rodríguez (Los Deltonos,Tejedor…). Venti son los cortes que se recueyen nél (amás d’un dvd que contién l’actuación y dellos materiales más). La heteroxeneidá y bayura d’estilos que caracteriza a la música de DIXEBRA ta más presente que nunca, añadiendo amás otros ritmos y sonoridaes a los yá conocíos toques punk, folk, reggae-ska, funk, rap… de les sos canciones. Soníu impecable, guitarres contundentes, gaita midi y sección de vientu son les principales característiques d’esti trabayu. Bayura d’estilos, pero coherencia na so propuesta musical que la fai creíble. Canciones rápides, skatalítiques, tiempos medios, esperimentación… ye lo que proponen nesta entrega discográfica. Con esti discu, DIXEBRA algama la madurez definitiva y conviértese nún de los puntales del rock asturianu.