SONES ye'l programa de TPA dedicáu a la canción y la música tradicional asturiana. Emítese tolos domingos en prime time y ye ún de los de más grande audiencia de la cadena.

Dende'l so empiezu, el 8 de septiembre de 2009, toles selmanes faise un siguimientu a los principales festivales y concursos que tienen llugar n'Asturies. Por SONES tienen pasao les principales voces de la canción asturiana, como tamién gaiteros, bandes de gaites, grupos de baille, grupos de folk, agrupaciones corales... y bien d'otros representantes de la música asturiana d'anguañu.

A lo llargo del sieglu XX, ya inda nel presente, l'asturianada ye'l xéneru más identificativu de la música asturiana porque cuenta con un públicu propiu, un calendariu d'actuaciones y conciertos, una rede de llugares y espacios d'actuación, y un mercáu bien estructuráu de venta de les sos producciones musicales.

SONES ye, asina, el reflexu televisivu d'un fenómenu musical que tien vida propia y mueve alredor a un impresionante númberu de siguidores.